సందర్భం

బాలలను .. స్వేచ్ఛగా ఎదగనిద్దాం ..

పాపం, పుణ్యం, కష్టం, సుఖం ఎరుగని బాల్యం.. తల్లిదండ్రుల సంరక్షణలో ఆనందంగా గడపాల్సిన పసిప్రాయం.. వెట్టిచాకిరి వైపు మళ్లించబడుతోంది. బడికెళ్లి పలక, బలపం పట్టాల్సిన చేతులు పలుగు, పార పట్టి బాలకార్మికులుగా మారుతున్నారు. అమ్మానాన్నలు లేకపోవడమో, ఆర్థిక ఇబ్బందులో, పొట్టకూటి కోసమో.. కారణం ఏదైనా.. ఆటపాటలతో ఆహ్లాదంగా సాగాల్సిన శైశవాన్ని చిన్నారులు కోల్పోతున్నారు. ఈ బాలకార్మిక వ్యవస్థను రూపుమాపి, భావితర బాలలను స్వేచ్ఛగా ఎదగనిద్దాం..!

అండమాన్ జైలు

ఇటీవల మేము కొందరు మిత్రులతో కలిసి అండమాన్ యాత్ర చేసి వచ్చాము.విహారయాత్రగా బయలుదేరిన మేము దాదాపు అన్నిచోట్ల విలాసంగా ఉల్లాసంగా గడిపాము కాని ఒకే ఒక్కచోట గుండెల నిండా విషాదం అలముకోగా ఆ రోజంతా దిగులు పడిపోయాం. యాత్ర ముగించుకొని, ఎవరిళ్లకు వాళ్ళం చేరినా అక్కడ కమ్ముకున్న ఆ దిగులు మేఘాలు ఇంకా విడిచిపోవడం లేదు. మమ్మల్ని అంతలా కదిలించిన ఆ చోటు అండమాన్ రాజధాని పోర్టుబ్లెయర్ లోని సెల్యూలార్ జైలు.