పుణె : మహారాష్ట్రలోని పుణెలో కురిసిన భారీ వర్షాల కారణంగా మెట్రో రైలులో నీరు లీక్ అయిన ఘటన కలకలం రేపింది. శుక్రవారం సాయంత్రం పింప్రి–స్వర్గేట్ పర్పుల్ లైన్లో నడుస్తున్న మెట్రో రైలులో ఈ సంఘటన చోటుచేసుకుంది. ప్రయాణికులతో నిండిన కోచ్లో పైకప్పు నుంచి భారీగా నీరు కారడంతో క్షణాల్లోనే లోపల నీరు నిలిచిపోయింది. తడవకుండా ఉండేందుకు ప్రయాణికులు కోచ్లోని ఇతర ప్రాంతాలకు వెళ్లేందుకు ప్రయత్నించిన దృశ్యాలు సోషల్ మీడియాలో వైరల్ అవుతున్న వీడియోల్లో కనిపిస్తున్నాయి. ఈ ఘటనతో పునరుద్ధరణ పనులు పూర్తి చేసుకుని సేవలు అందిస్తున్న అత్యాధునిక మెట్రో వ్యవస్థ నిర్మాణ నాణ్యత, భద్రతా ప్రమాణాలపై ప్రశ్నలు తలెత్తుతున్నాయి. కోచ్లోకి ఈ విధంగా నీరు చేరడం ప్రయాణికుల భద్రతకు ముప్పుగా మారుతుందని పలువురు ఆందోళన వ్యక్తం చేస్తున్నారు. ఘటనపై మెట్రో అధికారులు ఇంకా అధికారిక వివరణ ఇవ్వలేదు. మెట్రో మౌలిక సదుపాయాలను తక్షణమే తనిఖీ చేసి, లోపాలను సరిదిద్దాలని ప్రయాణికులు మరియు పౌర సంఘాలు డిమాండ్ చేస్తున్నాయి.
ఇదిలా ఉండగా, గత కొన్ని రోజులుగా తీవ్రమైన ఎండలతో ఇబ్బంది పడుతున్న మహారాష్ట్రలో శుక్రవారం పలు ప్రాంతాల్లో రుతుపవనాల ముందు భారీ వర్షాలు కురిశాయి. పుణెలో ఒక్కరోజులోనే 13.1 మిల్లీమీటర్ల వర్షపాతం నమోదైంది. ఈ వర్షం ప్రజలకు వేడి నుంచి ఉపశమనం కలిగించినప్పటికీ, మెట్రో లీకేజీ ఘటన ప్రయాణికులకు తీవ్ర అసౌకర్యం కలిగించింది.
కామెంట్లు (0)