Rains – నేడు ఎపిలో పిడుగులతో కూడిన వర్షాలు

విజయవాడ : బంగాళాఖాతంలో ఏర్పడిన ద్రోణి కారణంగా నేడు ఎపి లో పిడుగులతో కూడిన వర్షాలు కురిసే అవకాశం ఉంది. రాష్ట్రంలోని పలు జిల్లాల్లో తేలికపాటి నుంచి మోస్తరు వర్షాలు పడతాయని వాతావరణ శాఖ అంచనా వేస్తోంది. ముఖ్యంగా పార్వతీపురం మన్యం, అల్లూరి సీతారామరాజు, తూర్పు పశ్చిమ గోదావరి జిల్లాల్లో ప్రభావం ఎక్కువగా ఉంటుంది. కృష్ణా, ఎన్టీఆర్, నెల్లూరు, తిరుపతి జిల్లాల్లో కూడా వాతావరణం మారే సూచనలు కనిపిస్తున్నాయి. అప్రమత్తంగా ఉండి సురక్షిత ప్రాంతాల్లో ఉండటం మంచిది. రాష్ట్ర విపత్తుల నిర్వహణ సంస్థ ఎండీ ప్రఖర్ జైన్ కీలక సూచనలు చేశారు. పిడుగులు పడే ప్రమాదం ఉన్నందున ప్రజలు తగిన జాగ్రత్తలు తీసుకోవాలని కోరారు. ఉరుములతో కూడిన వర్షం పడుతున్నప్పుడు చెట్ల కింద నిలబడటం ప్రమాదకరం అని అన్నారు. పొలాల్లో పనిచేసే రైతులు, బయట తిరిగే వారు తక్షణమే సురక్షిత భవనాల్లోకి వెళ్లాలని కోరారు. అనవసరమైన పనుల కోసం బయటకు వెళ్లడం తగ్గించుకుంటే ప్రాణాపాయం నుంచి తప్పించుకోవచ్చునన్నారు. ఎపి లోని కీలక జిల్లాలపై ఈ వాతావరణ మార్పుల ప్రభావం స్పష్టంగా ఉంటుందని తెలియజేశారు. పార్వతీపురం మన్యం, అల్లూరి సీతారామరాజు, గోదావరి జిల్లాల ప్రజలు వాతావరణ పరిస్థితులపై దృష్టి పెట్టాలి. ఎన్టీఆర్, కృష్ణా, నెల్లూరు, తిరుపతి జిల్లాల్లో ఉన్న వారు కూడా వాతావరణ హెచ్చరికలను గమనించాలి. వాతావరణ శాఖ ఇచ్చే తాజా సమాచారం ఆధారంగా నిర్ణయాలు తీసుకోవాలి. వర్షాల సమయంలో ఎలక్ట్రానిక్ పరికరాలకు దూరంగా ఉండటం ద్వారా ప్రమాదాలను అరికట్టవచ్చు.