ఉమ్మడి నెల్లూరు జిల్లా జనసేనలో లుకలుకలు

ప్రజాశక్తి-అమరావతి బ్యూరో​ : ఉమ్మడి నెల్లూరు జిల్లా జనసేనలో లుకలుకలు తారాస్థాయికి చేరాయి. జిల్లా నాయకత్వం మొదలు గ్రామ స్థాయి వరకు నేతలపై అధినాయకత్వానికి వరుస ఫిర్యాదులు వెల్లువెత్తాయి. ఈ నేపథ్యంలో ఉమ్మడి నెల్లూరు జిల్లాలో కమిటీలన్నిటినీ రద్దు చేస్తున్నట్లు జనసేన అధ్యక్షులు, ఉపముఖ్యమంత్రి పవన్‌ కల్యాణ్‌ ‌‌వెల్లడించారు. ఈ మేరకు ఆదివారం ఆయన ఒక ప్రకటన విడుదల చేశారు. కొత్త కమిటీని నియమించే వరకూ జిల్లా పార్టీ వ్యవహారాలను కేంద్ర కార్యాలయమే పర్యవేక్షిస్తుందన్నారు. పార్టీ నాయకులలో క్రమశిక్షణ లోపించడం, పార్టీ విధి విధానాలకు భిన్నంగా వ్యవహరిస్తున్నారన్న ఫిర్యాదులు అందడంతో ఈ నిర్ణయం తీసుకున్నట్లు ఆయన వెల్లడించారు. నాయకుల మధ్య విభేదాలు, క్రమశిక్షణ రాహిత్యం వల్ల కార్యకర్తలు ఇబ్బంది పడుతున్నారని తెలిపారు. ఈ క్రమంలో జిల్లా, నగర, మండల, గ్రామ కమిటీలను రద్దు చేసినట్లు పేర్కొన్నారు. జిల్లా సమన్వయ బాధ్యతలు చూస్తున్నవారిని, కమిటీలలోని ఇతర సభ్యులను తప్పిస్తున్నట్లు చెప్పారు. ఇదివరకే ఉమ్మడి ప్రకాశం జిల్లా కమిటీని ఇదే విధంగా రద్దు చేశారు