ఉరుములతో కూడిన వర్షాలు చెట్లను విద్యుత్ కాంతితో తళతళలాడేలా చేస్తాయి. తుపాను వల్ల కలిగే చిన్నపాటి విద్యుత్ మెరుపులు పైన్ మొక్క సూదిలాంటి ఆకు చివరులు, ఇతర ఆకులపై మెరుస్తాయి. ఉరుములతో కూడిన తుపానులు అడవులకు ఒక నిగూఢమైన కాంతిని తెస్తాయి. మెరుపులను ప్రేరేపించే అవే శక్తులు, చెట్ల పైభాగాలను క్రిస్మస్ చెట్టు అలంకరణల వలె మెరిసేలా చేస్తాయి. ఇది మన కంటికి దాదాపు కనిపించకపోవచ్చు. దాదాపు శతాబ్ద కాలంగా, శాస్త్రవేత్తలు సెయింట్ ఎల్మో ఫైర్ అని పిలువబడే నీలికాంతి గురించి చర్చిస్తున్నారు. ఉరుములతో కూడిన తుపానులు ఆకాశంలో విద్యుత్ క్షేత్రాలను సృష్టిస్తాయి. వాటి నుండి విద్యుత్ ప్రవాహాలు కింద ఉన్న ఓడ స్తంభాల వంటి కొన్ని వస్తువులకు ప్రవహించి, అవి ప్రకాశించేలా ప్రేరేపిస్తాయి. ఇటీవలే మెరుపు కూడా చెట్ల పైభాగాలకు ఇలాంటిదే చేస్తుందేమోనని పరిశోధకులు ఆలోచించారు.
మొదట ప్రయోగశాలలో ప్రేరేపించబడిన ఈ కాంతులు ఇప్పుడు ప్రకృతిలో కూడా కనిపించాయి. చెట్ల కొమ్మల మీద ఈ మెరుపులు ఏర్పడతాయేమోనన్న ఆలోచన కొన్ని సంవత్సరాల నాడు మొదట తలెత్తిందని పాట్రిక్ మెక్ఫార్లాండ్ చెప్పారు. ఆయన స్టేట్ కాలేజ్లోని పెన్సిల్వేనియా స్టేట్ యూనివర్శిటీలో వాతావరణ శాస్త్రవేత్త. ఆయన, విలియం బ్రూన్ ఒక చెట్టు కింద ఉన్న పిక్నిక్ టేబుల్ వద్ద మధ్యాహ్న భోజనం చేస్తున్నారు. ఆ పాఠశాలలో వాతావరణ రసాయన శాస్త్రవేత్త అయిన బ్రూన్ పైకి చూస్తూ, “హ్మ్, ఉరుములతో కూడిన తుపానుల సమయంలో ఆ చెట్లు మెరుస్తాయేమో!” అని ఆలోచించడం మెక్ఫార్లాండ్కు గుర్తుంది. “ఆ మధ్యాహ్నం, మేము ఒక చెట్టు కొమ్మను తీసుకున్నాము!” అని మెక్ఫార్లాండ్ గుర్తుచేసుకున్నారు.
ప్రయోగశాలలో వారు ఆ కొమ్మ పైన ఒక అధిక -వోల్టేజ్ ప్లేట్ను ఉంచారు. దీనివల్ల కొమ్మ చుట్టూ ఉన్న గాలిలో రుణాత్మక ఆవేశం ఏర్పడింది. ఆ తర్వాత వారు ఆ కొమ్మను ధనాత్మక ఆవేశం ఉన్న ఒక విద్యుత్ ప్లేట్కు (భూమిని అనుకరించడానికి) జత చేశారు. దీనివల్ల ఒక విద్యుత్ క్షేత్రం ఏర్పడింది. “మేము ఊహించినట్లే, అది మెరవడం చూశాము,” అని మెక్ఫార్లాండ్ అన్నారు. అది చాలా అస్పష్టంగా కనిపించింది. కానీ అది లేత నీలి రంగు కాంతితో పాటు, కంటికి కనిపించని అతినీలలోహిత (యువి) కాంతిని కూడా వెదజల్లింది. ఇలాంటి కాంతులను కరోనా అంటారు. బలమైన విద్యుత్ క్షేత్రం కారణంగా సాధారణంగా తటస్థంగా ఉండే గాలి అణువులు విచ్ఛిన్నమై అయాన్లుగా (ఆవేశపూరిత పరమాణువులు లేదా అణువులు) మారినప్పుడు ఇది ఏర్పడుతుంది. ఇప్పుడు గాలి విద్యుత్తును ప్రసరింపజేయగలదు మరియు ప్రకాశిస్తుంది.
ప్రయోగశాలలో దీనిని చూడటం పరిశోధకులలో మరింత ఉత్సుకతను పెంచింది. వారు ఇలా ఆలోచించారని మెక్ఫార్లాండ్ చెప్పారు: “ఉరుములతో కూడిన తుపానుల సమయంలో కూడా మనం ఈ కాంతులను చూస్తామా?”
సరైన తుపాను కోసం వెతకడం
దీన్ని తెలుసుకోవడానికి ఆ బృందం 2024 వేసవిలో ఒక 2013 టయోటా సియెన్నా వ్యాన్ను సిద్ధం చేసుకుంది. ఉరుములతో కూడిన తుపానును గుర్తించడానికి అవసరమైన అన్ని పరికరాలను వారు అందులో అమర్చారు. కరోనా నుండి వెలువడే విలక్షణమైన యువి కాంతిని రికార్డ్ చేయడానికి వారు ఒక ప్రత్యేక కెమెరాను కూడా జోడించారు. ఆ తర్వాత వారు ఆ వ్యాన్లో ప్రయాణం మొదలుపెట్టారని మెక్ఫార్లాండ్ చెప్పారు. వారు “దాదాపు నెల పాటు దానిని ఫ్లోరిడా వరకు నడిపారు.”
ఫ్లోరిడా ఎందుకు అంటే..
ఈ రాష్ట్రంలోనే అత్యధిక ఉరుములతో కూడిన వర్షాలు కురుస్తాయి. అట్లాంటిక్ మహాసముద్రం, గల్ఫ్ ఆఫ్ మెక్సికో రెండింటి నుండి వీచే సముద్రపు గాలుల కారణంగా “దాదాపు ప్రతిరోజూ ఉరుములతో కూడిన వర్షాలు కురుస్తాయి” అని ఆయన పేర్కొన్నారు.
అయినప్పటికీ, కరోనాలను కనుగొనడానికి తుపాను వస్తే సరిపోదని ఆయన పేర్కొన్నారు. “మీరు సాపేక్షంగా ఎత్తుగా కనిపించే చెట్లు ఉన్న ఒక బహిరంగ ప్రదేశాన్ని ఏర్పాటు చేసుకోవాలి.” అంతేకాకుండా, మీరు పరికరాన్ని సిద్ధం చేసుకుని, దానిని ఒక చెట్టు వైపు గురిపెట్టాలి.. ఇదంతా తుపాను సమయంలోనే చేయాలి. “కాబట్టి ఇది నిజంగా చాలా సవాలుతో కూడుకున్నది.”
యాదృచ్ఛికంగా వారు తమ అత్యుత్తమ కరోనా-తయారీదారుని వద్దకు చేరుకున్నారు. “మేము పెన్సిల్వేనియాకు తిరిగి వెళ్తున్నప్పుడు అనుకోకుండా నార్త్ కరోలినాలో ఒక తుపాను ఏర్పడింది!” అని మెక్ఫార్లాండ్ చెప్పారు. అది తీరప్రాంత మైదానాల్లోని పెంబ్రోక్ పట్టణంలో జరిగింది. ఇక్కడ, వారు 90 నిమిషాల పాటు ఒక స్వీట్గమ్ చెట్టు, ఒక లోబ్లోలీ పైన్ చెట్టు యొక్క వీడియోను రికార్డ్ చేశారు.
మొత్తంగా, వారు 41 కరోనాలను గుర్తించారు. ఏదీ మూడు సెకన్ల కంటే ఎక్కువ సేపు నిలవలేదు. అంతేకాదు ఆ మెరుపులు ఒకేచోట నిలిచిపోలేదు. అవి మిణుకుమిణుకుమనే దీపాల్లా నాట్యం చేస్తూ, ఆకుల మధ్య, గాలికి ఊగుతున్న కొమ్మల వెంబడి దూకుతూ వేగంగా కదిలాయి. శాస్త్రవేత్తలు తమ పరిశోధన ఫలితాలను ఫిబ్రవరి 28 జియోఫిజికల్ రీసెర్చ్ లెటర్స్లో పంచుకున్నారు. ఉత్తర కరోలినా తుపానులోనే వారు చాలా వరకు కరోనాలను చూశారు. కానీ ఫ్లోరిడా, పెన్సిల్వేనియాలోని ఇతర తుపానులలో కూడా వారు కరోనాలను చూశారు. ప్రతిసారీ, ఆ మెరుపులు క్షణికమైనవే అని తేలింది. “ఈ కాంతులు చాలా చాలా విస్తృతంగా ఉన్నట్లు కనిపిస్తున్నాయి,” అని మెక్ఫార్లాండ్ ఇప్పుడు నిర్ధారించారు. “ఇంకా మరెన్నో ఉండవచ్చు… కానీ వాటిని చూసేంత సున్నితత్వం మనకు లేదు.”
కామెంట్లు (0)