కుట్ర

​పిల్లలెందరివో
బతుకులు వీధుల్లో చెరబడుతుంటే,
కళ్లుండి చూడలేని కబోది రాజ్యం!
​ఎవరి గర్భం? ఎవడి హుకుం?
అలసి సొలసిన బతుకుల ఆదరణ లేదు.
ఆ గర్భాల వేటలో ఎరగా
కాసుల వెదజల్లే ఆరంభ కుట్ర!
​
అద్దె గర్భం,
పేద గూటిలోకి చొరబడి,
నయానా భయానా వేయబడే వేలంలో
విపత్కర పరిస్థితిలో కొట్టుమిట్టాడుతుంటే,
రాజ్యం గర్భాన్ని విచ్ఛుకత్తులతో ఛిద్రం చేయ చూస్తుంది.
​
ముగ్గురు, నలుగురిని కనమంటూ
హోరెత్తించే రాజ్యం విదిల్చే పైకం,
పెంచే క్రమంలో ఏ మూలకీ సరిపోదు!
​రాజకీయ బకాసురుల చేతుల్లో
విద్య, వైద్యం సగటు మనిషిని పీల్చి పిప్పి చేస్తుంటే,
వత్తాసు పలికే రాజ్యం
ప్రభుత్వ రంగానికి నిధులనీ కేటాయించదు.
నిఘాని అటకెక్కించింది.
​
బీదా బిక్కి గర్భాలతో
రాజకీయ పబ్బం గడుపుకునే కుతంత్రం
అందరికీ తిండి ఇవ్వలేని రాజ్యం
రూకల్లో మతాన్ని జొప్పించి ఏలే నాటకాల తెరలు.
ఒక్కో తెర తీస్తుంటే, జుగుప్స ఒళ్లంతా.
​ఒక్కో ప్రశ్న ఉదయించాలి.
జవాబే దొరక్క, రాజ్యం ఉరిపోసుకునే దాకా
నిరంతర పోరాటం అవశ్యం!

– గిరి ప్రసాద్ చెలమల్లు, 94933 88201