వానలతో పాటు వ్యాధులను కూడా తీసుకొచ్చేది వర్షాకాలమే! ఈ సీజన్లో వాతావరణంలో పెరిగే తేమశాతం బాక్టీరియా, వైరస్లు, ఇతర హానికరమైన సూక్ష్మజీవుల పెరుగుదలకు కారణమవుతుంది. వాననీరు కుంటలు, వరద ప్రాంతాల్లో నిలిచిపోయి దోమల సంతానోత్పత్తికి అనుకూలంగా మారుతుంది. ఫలితంగా డెంగ్యూ, మలేరియా, న్యుమోనియా, చికున్గున్యా వంటి సీజనల్, వైరల్ వ్యాధులు వచ్చే ప్రమాదం పెరుగుతుంది.
ఈ వర్షాకాల సీజన్ను పిల్లలు ఎంజాయ్ చేస్తూనే అనారోగ్యాల బారిన పడకుండా తల్లిదండ్రులు కొన్ని జాగ్రత్తలు పాటించాలి. రోగనిరోధక శక్తి తక్కువ ఉన్న పిల్లలకు ఈ వ్యాధులు వచ్చే ముప్పు ఎక్కువగా ఉంటుంది. అందుకే తల్లిదండ్రులు వర్షాకాలంలో పిల్లల ఆరోగ్యం విషయంలో ప్రత్యేక శ్రద్ధ వహించాలి. వర్షాకాలం పిల్లలకు జలుబు, విరేచనాలు, డెంగ్యూ జ్వరం వంటి ఆరోగ్య ప్రమాదాలను పెంచుతుంది. తల్లిదండ్రులు సరైన పరిశుభ్రతను పాటించడం, పోషకమైన ఆహారాన్ని అందించడం, దోమల సంతానోత్పత్తిని నివారించడానికి శుభ్రమైన వాతావరణాన్ని కల్పించడం ద్వారా తమ పిల్లలను కాపాడుకోవచ్చు. ఈ సమయంలో విరేచనాలు, జలుబు, ఫ్లూ, ఫంగల్ ఇన్ఫెక్షన్లు వంటివి సర్వసాధారణం. పిల్లలకు కొన్ని సాధారణ వ్యాధులు సోకే అవకాశం ఉన్నప్పటికీ, వాటిని అధిగమించడానికి మార్గాలు ఉన్నాయి. అన్ని ప్రభుత్వ వైద్యశాలల్లో పూర్తిస్థాయి వైద్య సేవలు అందుబాటులో ఉన్నాయి.
జలుబు, వైరల్ ఫ్లూ జ్వరాలు : వర్షాకాలం అంటే ఫ్లూ, జలుబు ప్రారంభమయ్యే సమయం. ఒకరికి జలుబు వచ్చినప్పుడు తల్లిదండ్రులు, పిల్లలు, లేదా కొన్నిసార్లు తాతామామ్మలు కూడా సురక్షితంగా ఉండరు. ప్రత్యక్ష సంబంధంతో పాటు, ఒకరికొకరు దగ్గరగా నివసించడం వల్ల కూడా జలుబు వ్యాపిస్తుంది. ఆకస్మిక ఉష్ణోగ్రత మార్పులే తరచుగా ఫ్లూ, సాధారణ జలుబుకు కారణమవుతాయి. ఒక క్షణంలో వేడిగా, ఉక్కపోతగా ఉండి, ఆ మరుక్షణమే చల్లగా, తేమగా ఉండొచ్చు. జలుబు ఉంటే ముక్కు దిబ్బడ, దగ్గు, గొంతు నొప్పి వంటి లక్షణాలు ఉంటాయి. ఫ్లూ వస్తే పిల్లలకు స్వల్ప జ్వరం ఉండొచ్చు. వ్యాధి సోకిన వ్యక్తులకు కాస్త దూరంగా ఉండటం మేలు. చేతులను సరిగ్గా కడుక్కోవాలని పిల్లలకు నేర్పించాలి. డాక్టరు సలహా మేరకు కాచి చల్లార్చిన నీటిని తాగించడం, సులభంగా జీర్ణమయ్యే ఆహారం తీసుకోవడం, సూచించిన మందులు వాడటం ద్వారా సులభంగా బయటపడొచ్చు.
విరేచనాలు, కడుపు ఇన్ఫెక్షన్లు : వర్షాకాలం ప్రారంభంతో తాగునీటి కలుషితం ఎక్కువగా జరుగుతుంటుంది. సాధారణంగా పిల్లలకు కడుపునొప్పి వంటి సమస్యలు మొదలవుతాయి. పోషకాహారం తినడం, శుభ్రమైన నీరు తాగడం వీటిని నివారించడంలో సహాయపడతాయి. వీధుల్లో దొరికే ఆహార పదార్థాలను ఈ కాలంలో తినకుండా ఉండటమే మేలు. ఇంట్లోనే వేడివేడిగా తయారుచేసిన ఆహారం తినడం మంచిది.
దోమ కాటుతో జ్వరాలు : వర్షాకాలంలో పిల్లలకు వచ్చే అత్యంత ప్రమాదకరమైన వ్యాధుల్లో ఒకటి డెంగ్యూ జ్వరం. ఇది దోమకాటు వల్ల వస్తుంది. ఈ వ్యాధికి వెంటనే చికిత్స చేయకపోతే ఒక్కోసారి పిల్లలకు ప్రాణాంతకం కావొచ్చు. పిల్లలకు జ్వరం పెరిగినట్లు గమనించిన వెంటనే డాక్టరును సంప్రదించడం మేలు. డెంగ్యూ ప్రధానంగా నిల్వ ఉన్న నీటిలో, నీటి గుంటల్లో దోమలు పెరగడం వల్ల వ్యాపిస్తుంది. పిల్లలకు డెంగ్యూ ఉంటే వారికి వికారం, తలనొప్పి, అధిక జ్వరం వంటి లక్షణాలు ఉంటాయి. వ్యాధి వ్యాప్తిని నివారించడానికి ఇల్లు, చుట్టుపక్కల ప్రాంతాల్లో నీరు నిల్వ లేకుండా చూసుకోవాలి. బయట ప్రాంతాలకు వెళ్లినప్పుడు దోమలు కుట్టకుండా జాగ్రత్తలు తీసుకోవాలి.
పిల్లలకు సాధారణంగా దోమల ద్వారా వ్యాపించే మరో వ్యాధి మలేరియా. ఇది అనోఫిలస్ దోమ ద్వారా వ్యాపిస్తుంది. సకాలంలో చికిత్స తీసుకుంటే తగ్గుముఖం పడుతుంది. మలేరియాకు కారణమయ్యే పరాన్నజీవి తరచుగా ఆడ అనోఫిలస్ దోమ ద్వారా వ్యాపిస్తుంది. బిడ్డకు మలేరియా సోకితే అధిక జ్వరం, చలి, తలనొప్పి, వాంతులు వంటి లక్షణాలు ఉంటాయి. దోమలు కుట్టకుండా దోమతెరలు వంటివి ఏర్పాటుచేసుకోవాలి.
టైఫాయిడ్ : టైఫాయిడ్ అనేది అపరిశుభ్రమైన ఆహారం, నీటిని తీసుకోవడం ద్వారా వ్యాపించే ప్రమాదకరమైన వ్యాధి. సోకినట్లు గుర్తిస్తే, వీలైనంత త్వరగా చికిత్స ప్రారంభించాలి. సాల్మోనెల్లా టైఫీ అనే బాక్టీరియా వల్ల టైఫాయిడ్ వస్తుంది. ఇది అధిక జ్వరం, నీరసం, కడుపునొప్పికి కారణమవుతుంది. చికిత్స చేయకపోతే టైఫాయిడ్ పేగుల్లో రక్తస్రావానికి, ఇతర సమస్యలకు కూడా దారితీయొచ్చు. తాజా కూరలు, పండ్లు వంటివి శుభ్రం చేసి తీసుకోవడం మంచిది. భోజనానికి ముందు చేతులు కడుక్కోవాలి. శుభ్రమైన పాత్రల్లో పిల్లలు తినేలా చూడాలి.
కొందరు పిల్లలకు ఈ కాలంలో చర్మపు దద్దుర్లు, ఇన్ఫెక్షన్లు అత్యంత సాధారణమైనవి. పిల్లలు వర్షంలో ఆడుకుంటున్నప్పుడు మురికి నీరు వారి చర్మపు మడతలలో పేరుకుపోతుంది. వారు ఇంటికి తిరిగి వచ్చిన తర్వాత సరిగ్గా శుభ్రం చేసుకోకపోతే, అది ఫంగల్ లేదా బాక్టీరియల్ చర్మ ఇన్ఫెక్షన్లకు దారితీయొచ్చు. ఇన్ఫెక్షన్లు ఎక్కువగా తేమ వల్ల కలుగుతాయి. అపరిశుభ్రమైన చేతుల ద్వారా కూడా వ్యాపిస్తాయి. పిల్లలు వస్తువులను తాకిన తర్వాత వారి కళ్లు లేదా చెవులను రుద్దుకుంటారు. ఈ విధంగానే ఇన్ఫెక్షన్ వ్యాపిస్తుంది.
ఇవి పాటించటం మేలు
వర్షాకాలంలో పరిశుభ్రత పాటించేలా పిల్లలను ప్రోత్సహించాలి. తినడానికి ముందు చేతులు శుభ్రంగా కడుక్కోవడం అలవాటు చేయాలి. దోమలు, రోగాల బారిన పడే అవకాశం ఉన్న నీటిలో ఆడకుండా ఉండాలని వారికి చెప్పాలి. వర్షాకాలానికి తగిన ఫుట్వేర్ పిల్లలకు అందించాలి. ఈ కాలంలో జారి పడిపోకుండా నిరోధించడానికి మంచి గ్రిప్ ఉన్న బూట్లు లేదా రెయిన్ బూట్లను కొనివ్వాలి. తడి నేలలు, గుంటల్లో బ్యాక్టీరియా, కీటకాలు ఉంటాయి. పిల్లలకు వారి పాదాలను వీలైనంత వరకు పొడిగా ఉంచుకోవాలని చెప్పాలి.
వర్షాకాలంలో అనారోగ్యకరమైన ఆహారం తినడం లేదా కలుషితమైన నీరు తాగడం వంటి ప్రమాదాలు పొంచి ఉంటాయి. ఈ అపరిశుభ్రమైన పరిస్థితులు కడుపు ఇన్ఫెక్షన్లు, విరేచనాలకు దారితీస్తాయి. చిన్నారికి ఆరోగ్య సమస్యలు కనిపిస్తే వెంటనే వైద్యుడిని సంప్రదించాలి.
వర్షాకాలంలో దోమల సంఖ్య ఎక్కువై రోగాలు వ్యాప్తి చెందుతాయి. వీటి నుంచి పిల్లలను రక్షించడానికి దోమ నివారణ క్రీమ్లు లేదా ఇతర దోమ నివారణ సాధనాలు ఉపయోగించాలి. వారు బయట ఉన్నప్పుడు పొడవాటి స్లీవ్స్ ఉన్న షర్ట్, ప్యాంటు ధరించేలా చూసుకోవాలి. ఇంట్లోకి దోమలు రాకుండా కిటికీలు, తలుపులు మూసి ఉంచాలి.
పిల్లలను నీటి కుంటలు, గుంటలు లేదా వరదలతో నిండిన వీధులు వంటి ప్రదేశాల నుంచి దూరంగా ఉంచాలి. ఎందుకంటే నిలిచిపోయిన నీటి ద్వారా వ్యాధులు ప్రబలే అవకాశం ఎక్కువ. వీటిలో పదునైన వస్తువులు లేదా ఓపెన్ డ్రెయిన్లు, మ్యాన్హోల్స్ ఉండొచ్చు. వారి భద్రత కోసం అలాంటి ప్రదేశాలకు దూరంగా ఉంచడం ఉత్తమం.
– డాక్టర్ తన్నీరు సురేంద్ర, ఎండి (జనరల్ మెడిసిన్)
కామెంట్లు (0)