మనం ఎంతగా సామాజిక మాధ్యమాల మాయాజాలంలో పడిపోయామంటే.. ఆఖరుకు పిల్లల పెంపకంపైనా ఆ ప్రభావం పడుతుంది. పిల్లలకు పెట్టే ఆహారం, కొనిపెట్టే బొమ్మల వరకూ ప్రతిదీ మనం డిజిటల్ తెరల మీదే ఆధారపడుతున్నాం. ఇలా చేయడం తప్పా, ఒప్పా అన్న అయోమయమే ఎక్కువ. దీంతో సంకోచిస్తూనే వారికి ఆహారాన్ని అందిస్తున్నాం. ఏ చిన్న తేడా వచ్చినా నష్టపోయేది మనమూ, మన పిల్లలే అన్నది మర్చిపోవద్దంటున్నారు నిపుణులు. పైగా ఆ ఒత్తిడితో పిల్లలపై అరిచేస్తూ, కొట్టే వరకూ వెళ్తున్నాం. దాంతో మైండ్ఫుల్ పేరెంటింగ్కి రోజురోజుకీ దూరమవుతున్నాం. ఇప్పుడు మన చుట్టూ అలాంటివారే ఎక్కువ. దీని నుంచి బయటపడాలి. పిల్లలకు పోషకాహారంతోనే వాళ్ల జీవితం రంగులమయం అవుతుంది.
పేరెంట్స్ సహజంగా ఉన్నంతలో పిల్లలకు బెస్ట్ ఇవ్వాలనే తాపత్రయం. కానీ అందుకు ఎలాంటి విధానాల్ని ఎంపిక చేసుకుంటున్నాం అనేదే పేరెంటింగ్ ఎలాంటిదో నిర్దారిస్తుంది. ఒత్తిడీ, ఆందోళనతో కూడిన పెంపకంతో చాలామంది సతమతమవుతున్నారు. పిల్లల్నీ వీటి ప్రభావానికి గురిచేస్తున్నారు. అలాకాకుండా ఓ స్పష్టతతో, మనస్ఫూర్తిగా పిల్లల్ని పెంచమంటున్నారు నిపుణులు. ‘మైండ్ఫుల్ పేరెంటింగ్’ కూడా అదే చెబుతోంది. ఇదివరకు పిల్లలకు ఏం ఇవ్వాలన్నా, పెట్టాలన్నా పెద్దవాళ్ల సలహాలు, అనుభవమున్న స్నేహితుల్ని అడిగేవారు. కానీ ఇప్పుడు సామాజిక మాధ్యమాల మీదే ఎక్కువ ఆధారపడుతున్నారు. ఇలా చేసే ముందు ఫాలో అయ్యే సైట్లు మంచివో కాదో చెక్ చేసుకోవాలి. వీడియో, రీల్ ఏం చూసినా కామెంట్లు, రివ్యూలు చదవాలి. పూర్తి నమ్మకం కలిగితేనే సంబంధిత ఆహారపదార్థాలు పిల్లలకు పెట్టాలి. అప్పుడు ఏ సమస్యా ఉండదు.
మన పెట్టే పోషకాహారమే పిల్లల జీవితాలని రంగులమయం చేస్తుంది. వాళ్ల ఆరోగ్యం, ఆనందం ప్రతి తల్లిదండ్రికీ ప్రధాన అంశం. ఎవరి ఆరోగ్యానికి అయినా పోషకాహారమే ఆధారం. చిన్నప్పటి నుంచే సరైన ఆహార అలవాట్లు వారి భవిష్యత్తును రూపుదిద్దుతాయి. పిల్లలకు పోషకాహారం నేర్పేందుకు కొన్ని ముఖ్యమైన పేరెంటింగ్ పద్ధతులు ఇవి.
చిన్న వయస్సులోనే ప్రారంభం
పిల్లల ఆహార అలవాట్లు శిశువుగా ఉన్నప్పటి నుంచే ఆరంభమవుతాయి. ఆరు నెలల వరకు తల్లిపాలే శిశువుకు ఉత్తమమైన పోషణ. దీని తర్వాత మెత్తని, సహజమైన, పల్చని భోజనాన్ని మెల్లమెల్లగా ప్రారంభించాలి. వివిధ రకాల పండ్లు, కూరగాయల ప్యూరీలు ఇవ్వడం ద్వారా వారి రుచి కణాలు అనేక విధాలుగా వికసించే అవకాశం ఉంటుంది.
రంగురంగుల ఆహారం..
పిల్లల భోజనం రంగురంగులతో ఉండటం ముఖ్యం. పచ్చని కూరగాయలు, ఎరుపు పండ్లు, పసుపు లేదా నారింజ రంగు క్యారెట్లు, పండ్లు – ఇవన్నీ వివిధ విటమిన్లు, ఖనిజాలను అందిస్తాయి. ప్లేట్లో ఉన్న రంగులను చూసి పిల్లలు ఆకర్షితులవుతారు. ఒక రకమైన ఆహారం నచ్చకపోతే, విసుగు చెందకుండా వేరు వేరు రూపంలో, వేరు వేరు రుచులలో మళ్లీ మళ్లీ ఇవ్వడానికి ప్రయత్నించాలి.
కుటుంబం కలిసి భోజనం
పిల్లలు తల్లిదండ్రుల్ని అనుకరించడానికి ఇష్టపడతారు. కుటుంబంతో కలిసి భోజనం చేయడం వల్ల, మీరు తినే ఆరోగ్యకరమైన ఆహారాన్ని వారు కూడా తినడానికి ఆసక్తి చూపుతారు. ఈ సమయాన్ని ఆనందంగా, ఒత్తిడి లేకుండా ఉంచాలి. టీవీ, మొబైల్ ఫోన్లు లేకుండా, కుటుంబం గంట సమయం కలిసి గడపడం మంచి ఫలితాలను ఇస్తుంది.
స్నాక్స్ స్మార్టా..
పిల్లలు స్నాక్స్ ఇష్టపడతారు కదా! వారి చేతిలోకి జంక్ ఫుడ్ చేరకుండా ముందు జాగ్రత్తలు తీసుకోవాలి. ఇంట్లోనే పల్చటి పోషకాహార స్నాక్స్ తయారు చేయడం నేర్చుకోండి. పండ్లు, గింజలు, ఫ్రూట్ చాట్, స్ప్రౌట్స్ సలాడ్, బాదం పాలు వంటి ఆరోగ్యకరమైన ఎంపికలు ఉండాలి.
నీరు చాలా ముఖ్యం..
పిల్లలు ఆడుకోవడంలో, చదవడంలో మునిగిపోయి నీరు తాగడం మరచిపోతారు. వారికి నీటి ప్రాముఖ్యతను నేర్పించాలి. స్కూల్ బ్యాగ్లో ఎల్లప్పుడూ నీటి బాటిల్ ఉండేలా జాగ్రత్త తీసుకోవాలి. సోడా, ప్యాక్ట్ చేసిన జ్యూసుల కంటే తాజాపండ్ల రసాలు, నీళ్లను ప్రోత్సహించాలి.
వారినీ భాగస్వామ్యం చేయండి..
గ్రోసరీ షాపింగ్కు పిల్లల్ని తీసుకెళ్లాలి. వారితో కూరగాయలు, పండ్ల రంగులు, ఆకారాలు గురించి మాట్లాడాలి. వంటల్లో సహాయం చేయమని చెప్పాలి. అలాగే వారి ఆహారం ఎలా తయారవుతుందో చూపించాలి. ఇలా వారిని అన్నింటిలో భాగస్వామ్యం చేయడం వల్ల ఆహారంతో వారికి అనుబంధం ఏర్పడుతుంది.
ఒత్తిడి చేయొద్దు..
ఏదైనా పదార్థం తినమని బలవంతం చేయవద్దు. ఇది ఆ ఆహారం పట్ల వ్యతిరేక భావనను మరింత పెంచుతుంది. బదులుగా, ఆ ఆహారం వల్ల కలిగే ప్రయోజనాలను సరళంగా, ఆటలా వివరించాలి. ”ఈ క్యారెట్ తిన్నావంటే కళ్లు ఎంతో అందంగా అవుతాయో!” అంటూ సానుకూలంగా చెప్తూ ప్రోత్సాహించాలి.
నియమిత సమయం, నియమాలు..
ఆహారం ఎప్పుడు, ఎక్కడ తింటారు అనేది కూడా ముఖ్యం. నియమిత సమయంలో భోజనం చేయడం, టీవీ ముందు కాకుండా డైనింగ్ టేబుల్ వద్ద కూర్చోవడం వంటి నియమాలు పాటించాలి. తల్లిదండ్రులూ స్వయంగా ఆరోగ్యకరమైన ఆహారం తింటూ ఆదర్శంగా నిలవాలి.
ఓపిక, స్థిరత్వం..
పిల్లల్లో ఆహార అలవాట్లు రావడానికి ఓపిక అవసరం. ఒకరోజు నచ్చకపోతే, వారి ఆసక్తి మారవచ్చు. కాబట్టి విసుగు చెందకుండా, స్థిరంగా ప్రయత్నిస్తూనే ఉండాలి. చిన్న చిన్న విజయాలను కూడా ప్రశంసించాలి.
పిల్లల పోషకాహారం అనేది ఒక పెద్ద యుద్ధం కాదు, ఒక సుందరమైన ప్రయాణం. ఈ ప్రయాణంలో తల్లిదండ్రులే మార్గదర్శకులు. ప్రేమ, ఓపిక, సృజనాత్మకతతో మీ పిల్లలను ఆరోగ్యకరమైన భవిష్యత్తు వైపు నడిపించాలి. వారి జీవితంలోని ప్రతి రంగు, ప్రతి రుచి ఎంతో సంతోషంగా నిండిపోయేలా చూసుకోవాలి.
కామెంట్లు (0)