తీగలు లాగిన డొంకలు

​నడవటానికి కాళ్ళకు అడ్డం వస్తూ,
అడ్డదిడ్డంగా అల్లుకుపోతూ,
దారుల నిండా ఈ రంగురంగుల తీగలేమిటో!
​వాటిని దాటుకుంటూ,
తగలకుండా తప్పించుకుంటూ,
"పదండి ముందుకు" అంటూ,
ముందుకు, ముందుకు
కదలి సాగాలనుకుంటే,
నేనూ నువ్వే కాదు,
బతుకులో గాయాలు తగిలిన ఎందరెందరమో,
దిక్కుతోచక నిలబడిపోతూనే వున్నాం.
​
ఒక్కసారి, ఒకే ఒక్కసారి,
తీగల చివర్లు దేనికి తగులుకుని ఉన్నాయో,
ఎవరైనా చూడండి బాబూ!
​అవి గడకర్రలకు చుట్టి వున్నాయా?
కర్రలకు పైన రంగుల పతాకాలున్నాయా!
​అయిదేళ్ళ రుతువుల వరకూ
రెపరెపలాడవు అనుకోడానికి లేదు.
ఎప్పుడు ఏ గాలి వీస్తుందో!
​
పతాకాలు పైకి లేచాయంటే,
ఈ తీగల రెండో చివర్లన
తగులుకొనివున్న డొంకలన్నీ కదిలి,
గబ్బుకంపుగానీ లేచిందంటే,
నిన్నూ నన్నే కాదు,
వాతావరణాన్నంతట్నీ కమ్మేస్తుందేమో!
​
కర్రలు పట్టిన చేతులు పైకి లేచినా,
పతాకాలు అహంకారంతో ఎగిరినా,
ఈ తీగలు లాగిన ఈ డొంకలన్నీ
మన కాళ్ళకే కాదు,
బతుకుల్ని కూడా తగులుకున్నాయంటే,
బొక్కబోర్లా పడతామేమో.
​
భద్రం బాబూ, భద్రం!
​
- శీలా సుభద్రాదేవి, 8106883099