కోల్కతా: అమెరికా విదేశాంగ మంత్రి మార్కో రూబియో నాలుగు రోజుల అధికారిక దౌత్య పర్యటన నిమిత్తం శనివారం భారత్కు విచ్చేశారు. ఆయన తొలిసారిగా కోల్కతాలో పర్యటించారు. ఒక అమెరికా విదేశాంగ మంత్రి కోల్కతాలో పర్యటించడం ఇదే మొదటిసారి. ఆయన ఈ సాయంత్రం న్యూఢిల్లీలో ప్రధానమంత్రి నరేంద్ర మోదీని కలుస్తారు. రాబోయే రోజుల్లో వాణిజ్యం, సాంకేతికత, రక్షణ, క్వాడ్ భాగస్వామ్యం వంటి అంశాలపై చర్చించనున్నారు. తన పర్యటనకు బయలుదేరే ముందు రూబియో మీడియాతో మాట్లాడుతూ, భారత్కు అవసరమైనంత ఇంధనాన్ని విక్రయించడానికి అమెరికా సిద్ధంగా ఉందని, ప్రస్తుతం అమెరికా రికార్డు స్థాయిలో ఇంధనాన్ని ఉత్పత్తి చేసి ఎగుమతి చేస్తోందని తెలిపారు.
మార్కో రూబియో కోల్కతా నగర నడిబొడ్డున ఉన్న ‘మిషనరీస్ ఆఫ్ ఛారిటీ’ ప్రధాన కార్యాలయం ‘మదర్ హౌస్’ను, దాని పిల్లల గృహాన్ని సందర్శించారు. మదర్ థెరిసా స్థాపించిన ‘మిషనరీస్ ఆఫ్ ఛారిటీ’కి ‘మదర్ హౌస్’ ప్రధాన కార్యాలయం. రూబియో భారత పర్యటన మే 23 నుంచి 26 వరకు ఉంటుంది. కోల్కతాతో పాటు, ఆయన ఆగ్రా, జైపూర్, న్యూఢిల్లీలలో కూడా పర్యటిస్తారు. ఇంతకుముందు, 2012 మేలో కోల్కతాను సందర్శించిన చివరి అమెరికా విదేశాంగ కార్యదర్శి హిల్లరీ క్లింటన్.
26న క్వాడ్ సమావేశం
పర్యటన చివరి రోజైన మే 26న క్వాడ్ విదేశాంగ మంత్రుల సమావేశం జరగనుంది. ఈ సమావేశానికి భారత విదేశాంగ మంత్రి ఎస్. జైశంకర్ అధ్యక్షత వహించనున్నారు. ఈ సమావేశంలో అమెరికా విదేశాంగ కార్యదర్శి మార్కో రూబియోతో పాటు, ఆస్ట్రేలియా విదేశాంగ మంత్రి పెన్నీ వాంగ్, జపాన్ విదేశాంగ మంత్రి మొటెగి తోషిమిత్సు కూడా పాల్గొననున్నారు.
కామెంట్లు (0)