అమ్మా! ఇక విసిగించను!

అమ్మా! నోరూరుతోంది
ఆకలి దంచేస్తున్నది
​
ఇంత గిన్నె సాంబారును
ఇడ్లీలకు జతగ పెట్టు
ఉప్మా పెసరట్టు కలుపు
ఉల్లిపాయ మరువవద్దు
ఒక్క దిబ్బరొట్టె పెట్టు
ఒక్క ముక్క మిగలదొట్టు
​
పిజ్జాలూ, బర్గర్లను
పిల్లలంత మానాలని
పానీపూరీ, చిప్సూ
పాడుచేయు దేహాన్నని
బడిలోపల నేర్పారు
బయట తిండి మానాలని
​
అమ్మ చేతి వంటంటే
అమృత సమము, అద్భుతమని
ఇంటి వంట తింటుంటే
ఇబ్బందులు పడబోమని
అమ్మా! ఇక విసిగించను
అలిగి తిండి మానేయను
​
హమ్మయ్యా! నవ్వావా?
హాయిగ నను చూశావా?
ఆకుకూర, కాయగూర
ఏదైనా తింటానిక
ఫలాలనూ గింజలనూ
పారేయక నే తింటా.
​- గుడిపూడి రాధికా రాణి, 94949 42583.